21-р зуун-Роботтой алхах эрин үе

optimus_prime_in_new_transformers_3-wide1926 онд “Metropolis” гэдэг роботын тухай кино гарч байснаас хойш өнөө үеийг хүртэл асар олон роботын тухай кино гарсаар байгаа билээ. Жишээлбэл, “Transformers”, “I Robot”, “The Terminator”, “Real Steel”, “Iron man” гээд за бүр цаашлаад бид бүгдийн мэдэх “Voltron” гэх мэт. Тэгвэл энэ удаагийн нийтлэлээр Роботын ертөнцийн тухай жаахан ч гэсэн сонирхолтой зүйл бичье гэж бодлоо.

Робот нь орчин цагт бид бүгдийн амьдралд салшгүй холбоотой нэгэн зүйл болжээ. Одоогийн байдлаар маш олон зориулалтын төрөл бүрийн Роботууд судлагдаж ашиглагдсаар байна. Роботууд маань хүн төрөлхтөнд ямар ач тус хүргэж байгааг тухай тухайн чиглэлээр нь ялгаж авч үзье. Энгийн үгээр хэлбэл Робот нь ядардаггүй, эвдрэлт бага, цалин хөлс шаардахгүй, хүн ажиллах боломжгүй газар ажиллаж чадах, нарийн хэмжилт хийх чадвар болон нарийн тогтвортой хөдөлгөөн хийх гэх мэт давуу чанараараа хүн биднээс илүү билээ. Робот нь анх 18-19-р зууны үед зураг зурдаг “Automaton” нэртэй хүн хэлбэртэй цагны механизмаар ажилладаг зүйлээс эхлэлтэй гэж үздэг. Энэ тухай “Hugo” гэж кино хүртэл байдаг билээ. Японы хувьд “Каракүри” гэж цай зөөдөг роботоос эхлэлтэй байх жишээний.

  • Шинэ эрин үеийн хүн дүрст робот

asimo_2049641bХамгийн том жишээ бол яалт ч байхгүй Японы Honda корпорацийн “Asimo” билээ. Asimo нь яг л хүн шиг хөдөлгөөнийг хийж чаддаг. Мөн хүний үнэрлэх мэдрэмжээс бусад 4 мэдрэхүйтэй мэдрэмж суулгагдсан байдаг. Танд аягатай кофег чинь ширээн дээр асгалгүй тавьж өгөх чадвартай. Мөн таны царайг нэртэй тань цээжилбэл, өөр хүн таны нэрийг дуудахад тань руу харах, дохионы хэл ойлгодог гэх мэт нарийн чадварууд хүртэл суулгагдсан байдаг. Ирээдүйд роботын үнэ хямдарсан үед ийм роботууд эмнэлэг болон сувилгааны газар, мөн үйлчилгээний газруудад хэрэглэгдэж болох л юм. Одоогийн байдлаар Asimo нь 130см өндөр 54кг орчим жинтэй юм байна. Цаашдаа ямар гайхалтай хөгжих бол… “I robot” кинон дээр гардаг шиг айл бүрт нэг робот байвал???… Хүн төрөлхтөнтэй шууд холбоотой роботын өөр нэгэн технологи гэвэл “Power assistant” буюу нэмэлт хувцас билээ. Энэ нэмэлт хувцаснууд нь булчингийн тань үүргийг орлох болно. Нас ахих үед шатаар гарах, хагас суух, сууж байгаад босох гэх мэт үед булчингийн хүндрэлүүдтэй учирдаг. Тэгвэл таны бөгсөн биетэй холбогдсон энэхүү дэмжигч эд маань, таныг чөлөөтэй босож суулгаж чадна. Цээжин биетэй холбогдох хэсэг нь хүнд юм өргөх зэрэгт нэн тохиромжтой. Нэг үгээр хэлбэл хиймэл булчин үүсгэгч л юм даа. Америкт энэ технологи нь цэргийн зориулалтаар ч хөгжиж байгаа билээ. Төсөөлөхөд бэрх байгаа бол та бидийн сайн мэдэх “Mortal Kombat”-ийн Jax хэмээх дүр хангалттай нэгэн жишээ болох байх.

  • Хүний хэрэглээ болсон чухал роботууд

aiboТа зүгээр л дотор нь орж суугаад эсвэл алсаас удирдана. Японд гамшиг болсон үед ийм роботуудыг нилээн их ашигласан байдаг. Мөн хиймэл дагуул дээр ажилладаг роботууд ч гэсэн энэ бүлэгт орох болов уу. Сансрын судалгаанд хүнийг явуулна гэдэг бол хамгийн бүтэшгүй энэ үед, роботыг ашигласаар байна. Тухайн гариг дээрх зүйлийг роботоор дамжуулан судлах нь цаашдаа улам эрчимтэй хөгжих болов уу. Мөн дэлхийд зориулагдсан гэвэл ихэвчлэн хүн орох боломжгүй газарт ажиллах роботууд шаардлагатай байдаг. Хамгийн энгийн жишээ гэвэл 2011 оны 3 сарын 11ний өдөр болсон газар хөдлөлт, цүнамигаас болж осол гарсан “Фүкүшима”-ийн атомын цахилгаан станц билээ. Хүн ойртох нь аюултай үед роботуудын үүрэг их байсан нь тодорхой. Бас нэгэн төсөөлөхөд амар жишээ гэвэл “Avatar” дээр гардаг эсрэг талын дүрийн сууж удирддаг роботыг санаж байгаа биз дээ?
Үүн дээр нэмэгдээд гэрийн тань тоосыг сорж өгдөг, гал гарахад унтраадаг, хоол хийж өгдөг, бүр цаашлаад хоолыг чинь халбагдаж өгдөг, шүдийг чинь угааж өгдөг гээд олон төрөл. Мөн таны хобби болох роботууд ч их хөгжсөөр байна. Таныг гэртээ харьж ирэхэд таньтай мэндэлж таньтай ярьдаг роботууд, таны үнэнч анд болох нохой робот гэх мэт. 2 хон жишээ оруулъя “AIBO”, “Robi”, сонирхсон нэг нь судалж үзнэ биз. Би лав бага ангидаа байхдаа “Aibo” гэдэг роботыг мэдчихээд адилхан хэлбэртэй баттерейгаар ажилладаг, чихээ хөдөлгөж доороо эргэдэг робот нохой авхуулж байсан юм даг.

  • Анагаах болон сувилахуйн салбарт робот маань…

davinci_surgical_systemАнагаах болон сувилахуйн салбарт техник инженерийн салбар маш чухал гэж би энд дурьдмаар байна. Эс болон эмийн судалгаа, амьтны туршилт гээд анагаах ухаан маань нилээн судлагддаг ч, шинжилгээний аппаратууд болон мэс заслын чиглэлийн эмчилгээнүүд орчин үед техник технологийн ачаар улам нарийн болсон билээ. Энэхүү нийтлэлдээ тэгвэл тэр бүгдийн нэгээхэн хэсэг болох роботын анагаах ухаанд үзүүлэх үүргийг хэдэн жишээн дээр тайлбарлая.

Америкийн нэгдсэн улсад үйлдвэрлэгдсэн “da Vinci Surgical System” хэмээх хагалгааны робот. Роботоор хагалгаа хийх ямар давуу талтай гэж? Таны биед маш жижигхэн хэмжээний нүх гаргана, гарын хурдыг удаашруулсан хурдаар хөдөлгөж нарийн хагалгааг хийх боломжтой. Өөрөөр хэлбэл эмчийн гарын чичиргээг үгүй болгоно гэсэн үг. Зай их эзлэх учир олуулаа нийлсэн хагалгаа, хүний биеийн дотор гүн хэсгийн хагалгаа зэрэгт тохиромжгүй гэсэн сул тал байгаа ч одоогоор нилээн судлагдаж, найдагдаж байгаа чиглэл юм.
Роботыг ашиглаж эрхтний зургийг томруулж, тодруулж харж чадна. Өвчний оношлогооны хувьд зурагнаас шинжлэх гэдэг маш чухал байдаг бөгөөд, хагалгааны үед заавал ашигладаг нэгэн зүйл удахгүй болно биз ээ.

Мөн хүний биед маш жижигхэн нүх гаргаж хавдар болон чулуу зэргийг авахад зориулагдсан “Hyper Finger” гэх зэрэг робот байна. Энэ нь үзүүр хэсэгтээ камертай бөгөөд та өөрийн нүдээр харж гараараа авах шаардлагагүй бөгөөд, жижигхэн нүх гаргаад роботоо шургуулж хэрэгтэй хэсгийг тасдахад л хангалттай. Монголд үүнтэй адил дурангийн хагалгаа аль хэдийн хэрэгжиж эхэлсэн байгаа билээ.
Хамгийн сонирхолтой нэгэн робот бол эм хэлбэрийн камер билээ. Та зүгээр л эм ууж байгаа юм шиг уух бөгөөд, энэ нь таны эрхтний зургийг авдаг байна. Энэ нь хамгийн нямбай бөгөөд, нарийн шинжилгээ болох билээ. Таны гэдсэн дотор жижигхэн жуулчин баахан зураг аваад л аялаад байна гэсэн үг. Энэ зураг нь бид бүгдийн Фейсбүүк дээр тавигддаг шиг эмч рүү илгээгдээд л байна гэсэн үг юм. Анагаахын чиглэлээс гадна, сувилгаа асаргааны чиглэлд роботууд тун чухал үүрэгтэй байдаг билээ. Өөрөө босож хэвтэж чадахгүй, хүний тусламж заавал хэрэгтэй иргэдийг роботын тусламжтайгаар өргөж, зөөх боломжтой болдог.

  • Зэвсэгт хүчин

JGladiator01Энэ чиглэл бол яалт ч байхгүй тэр чигтээ Америк гэхэд хэлсдэхгүй. Америкийн судалгаанууд дайны чиглэлтэй байх нь элбэг бөгөөд ялангуяа роботын ертөнцөд үүгээрээ толгой цохиж байна. Зэвсэг зөөх чадвартай “Bigdog”, нисэгчгүй онгоцууд “Drone”, жижиг хэлбэрийн хуягт танкууд “UGV” гээд бүр хэрээс хэтэртлээ хөгжчихсөн байна. Интернет худалдааны Амaзон “Amazon” компани хүртэл жижиг хэлбэрийн нисдэг тэргүүдийг ашиглан хүргэлт үйлчилгээг явуулах тухай төлөвлөөд байгаа билээ. Би дайнд дургүй тул энэ талаар бүр нарийн бичмээргүй байна. Технологийн хөгжил талаасаа бол Америкийн судалгаанууд бусдыгаа хол хаясан байна. Хэдхэн жилийн дараа роботон цэргүүд хүртэл үйлдвэрлэгдэх магадлалтай байгаа билээ. Та сонирхолтой бол нарийн судалж үзнэ үү.

bigdogЭнэхүү нийтлэлдээ роботын ертөнцийн нэгээхэн хэсгийг л та бүхэнд танилцууллаа. Робот гэдэг нь зүгээр нэг хүн шиг хэлбэртэй механик эд биш бөгөөд, хүний мэдрэхүйг орлуулан хийж, ямар зорилгоор ашиглах гэх зэргээс хамаарч газар бүр маш олон чиглэлээр судалж байна. Манай Монгол орны хувьд, жил болгон Робокон зэрэг уралдаан зохиогддог билээ. Би оролцож ч байгаагүй, сайн мэдэхгүй ч гэсэн маш гайхалтай санаа, сэтгэлгээ харагддаг. Бидэнд Монгол роботын ертөнцийг хөгжүүлэх хангалттай боломж, чадвар байдаг гэж би боддог. 21-р зуун, та тун удахгүй роботтой зэрэгцэн амьдрах цаг айсуй. Харин цэрэг дайны бус, энх тайвны төлөө, хүний төлөө гэсэн технологийн дэвшил байгаасай…

 2014.04.18

И. Өгөөмөр

Хуваалцах
About Uguumur Itgel 98 Articles
IHI корпорацид инженер, Механик инженер мэргэжилтэй, Уг веб хуудасны техник хариуцсан дэд ахлагч, эгэл даруу нэгэн :)

Be the first to comment

Leave a Reply

Your email address will not be published.


*