Та мөнх амьдрах тухай мэдээж хэрэг бодож л байсан биз?

Та мөнх амьдрах тухай мэдээж хэрэг бодож л байсан биз? Би мөрийцсөн ч алзахгүй гэдэгтэй итгэлтэй байна. Учир нь бидний өсч торниж ирсэн цаг үе,одооноос өмнөх цаг үед ч мөн адил кино дуу хөгжимд нь мөнх амьдрах тухай  өгүүлж, харин шинжлэх ухаан нь мөнх амьдрах боломжийг хайсаар л байна. Олон олтлоо хайх л байх. Мөнх амьдарна гэдэг мэдээж хэрэг энгийн нүдээр бол боломжгүй зүйл. Гэхдээ таньд дахиад хэлье / Өмнөх нийтлэлүүддээ өгүүлсэн учир…/ Боломжгүй зүйл гэж байхгүй хэцүү зүйл л гэж байгаа. Та хүмүүсийн дунд, дэлхийд мөнх амьдарч чадна. Гэхдээ өнөө цагт мөнх амьдрах цор ганц арга байна. Маш хүнд хүчир ганц л зүйл таныг мөнх амьдруулж чадна. Энэ бол мөнх үлдэх зүйлийг бүтээх, аль эсвэл үйл хэргийг бүтээх явдал юм. Та итгэхгүй бол түүхэн хүмүүсийг нэг санах гээд үзье. “Надад мөрөөдөл бий!” / i have a dream!/… тэгэхээр энэ үгийг хэлсэн  агуу Мартин Лютер Кинг Жүниор нь намайг төрөхөөс лав 30 гаруй жилийн өмнө хорвоог орхисон хүн юм. Гэвч түүний бид бүгдэд үлдээсэн агуу үг, ухаан нь дэлхий дээр оршисоор байна. Түүний тухай бид ярилцсаар л байна. Анхан шатны илтгэгчээс авхуулаад мэргэжлийн илтгэгчид түүний илтгэл хэлсэн үгнээс иш татаж, түүнээс үлгэр дууриалал авсаар байна. Тэрээр үйл хэргээрээ бид бүгдийн дунд мөнхөрч үлджээ. 1756 онд Австри улсын Салзбург хотод төрсөн хөгжмийн агуу зохиолчдийн төлөөлөл болох Мозарт бас нэгэн тод том жишээ билээ. Түүний агуу мэдрэмжээс төрөн гарсан бүтээлүүд нь хэдэн зууныг дамжин дэлхийд цуурайтсаар байна. Тэрээр өөрийн бүтээсэн агуу бүтээлээрээ бид бүгдийн дунд амьдарсаар байна. Магадгүй миний сэдэв таньд утгагүй санагдаж магадгүй юм. Тэгвэл би таньд бас нэгэн тод жишээг толилуулая. Энэ бол попын хаан хэмээн үеэс үед нэрлэгдэж буй ирээдүйд ч нэрлэгдэх давтагдашгүй Майкэлл Жексон юм. Бусдыг уйлуулж дуулуулж, дэлхийг тэр аяар нь дуугаараа байлдан дагуулж байсан энэ агуу дуучин 2009 оны 6 сард харамсалтайгаар 50 насандаа мөнх бусыг үзсэн билээ. Таниас тэгвэл нэг асуулт асууя. Майкэлл Жексоны 2014 онд саяхан гаргасан “Xscape” хэмээх нэртэй шинэ цомгийг та сонсож үзсэн үү? Түүний алдарт дуучин Жастин Тимбэрлэйк- тэй дуулсан шинэ дууг нь сонсож үзсэн үү? Майкэлл Жексон амьд байгаа. Түүний попын хаан хэмээх нэр хүнд, өдийг хүртэл туурвисан уран бүтээл, дэглэсэн бүжиг, хийсэн тоглолт, бүтээсэн үйл хэрэг нь түүнийг бидний дунд байлгасаар байна. Та одоо бага ч гэсэн ойлгож байгаа болов уу. Агуу хүмүүс агуу үйл хэргээрээ агуу хүн болдог. Түүгээр дутахгүй агуу үйл хэрэг нь зуунаас зуун дамжин тухайн хүний нэр хүндийг дэлхийд түгээсээр байдаг ба агуу хүн үйл хэрэгтээ мөнх амьдарч чаддаг гэж үзсэн санаагаа хэлэх гэсэн юм.
Нэгэн алдар нэрэнд хүрсэн ухаант хүн хэлэхдээ “Мөнх амьдрахыг хүсвэл мөнх зүйлийг бүтээ” гэж нэгэнтээ хэлжээ. Миний гол хэлэх гэсэн санаа энэ юм.  Яг хэн хэмээх философич хэлснийг мэдэхгүй ч багш маань “Үхсэн мөртлөө амьд мэт хүмүүс, амьд мөртлөө үхсэн мэт хүмүүс” гэж лекц тавьж байх зуураа хэлж байсан юм. Дээр дурьдсан хүмүүс бол үхсэн мөртлөө амьд мэт хүмүүсийн тод жишээнүүд юм. Үхсэн мөртлөө амьд мэт тийм агуу хүн болж чадах эсэх нь хүн болгоны хувьд агуу эргэлзээтэй зүйл билээ. Гэсэн хэдий ч ядаж амьд байх хугацаандаа үхсэн мэт байхгүй амьдрах сонголт бидэнд бий. Таньд дахин нэг сануулая, Боломжгүй зүйл гэж байхгүй, ганцхан хэцүү зүйл л гэж бий. Ингээд нийтлэлээ бас нас барсан ч  өдгөө амьд мэт нэр нь дуурсагдсаар буй нэгэн шүлэгчийн 4 мөртөөр дуусгая.
Босоо ч биш хэвтээ ч биш хоёрын хооронд амьдралаар
Боол ч биш хаан ч биш цаг нөгцөөгөөд яах юм бэ?
Асдаг юм бол дүрэлзэж байгаад дуусаач
Асгардаг юм бол буцалж байгаад ширгээч (Р.Чойном)

Нэмэлт: Доорх линкээс Майкэлл Жексон болон Жастин Тимбэрлэйк нарын шинэ уран бүтээлийг сонирхон үзнэ үү!
https://www.youtube.com/watch?v=oG08ukJPtR8

Таныг хүндэтгэсэн
Шиншюү их сургууль
2-р курс М.Э

Хуваалцах
Мооёо
About Мооёо 20 Articles
Эдийн засгаар сурч буй том мѳрѳѳдѳлтэй энгийн нэгэн оюутан.

Be the first to comment

Leave a Reply

Your email address will not be published.


*