Жингээ тогтмол барих арга

Танд өлсөөгүй мөртлөө ямар нэг зүйл идмээр санагдах үе байдаг уу? Хэрэв тийм бол энэ нь жин нэмэгдэх суурь шалтгаан болох эрсдэлтэй байдаг байна.

Бидний дунд гэдэс цадсан ч гэсэн сэтгэл цадахгүй юмаа гэх үе байдаг. Танил санагдахгүй байна гэж үү? Энэ бол хэтрүүлж идэхийн үндэс нь юм. Ихэнхи илүүдэл жинтэй хүмүүс, хоол хүнсийг хэтрүүлэн идсэнээс болоод жин нэмэх хандлагатай байдаг. Өөрөөр хэлбэл идэж буй хоол хүнсний хэмжээ, төрөл зүйлээс хамаарч биеийн жин харилцан адилгүй байдаг гэж хэлж болохоор ажээ.

Тэгвэл жин багатай туранхай хүмүүс хоол хүнсний талаар ямар бодолтой байдаг вэ? Энэ талаар уншигч та бүхэнд товч танилцуулья.

Жин багатай хүмүүс хоол идэх үедээ, илүүдэл жинтэй хүний хийдэггүй дараах 4 зүйлсийг хийдэг байна.

  1. Өлссөн үедээ л хоол идэх
  2. Өөрийнхөө идэхийг хүссэн зүйлээ л идэх
  3. Хоолоо аажим аажмаар амталж идэх
  4. Ходоод цадсан л бол идэхээ болих

Ердөө эдгээр зүйлсийг л хоол идэх үедээ дадал зуршил болгож заншвал их идэхээс сэргийлж, биеийн жингээ хэвийн хэмжээнд барьж чадах боломжтой юм. Тун энгийн байгаа биз.

  1. Өлссөн үедээ л хоол идэх

Тогтмол бага жинтэй хүмүүсийн ихэнхи нь хоол хүнсний талаар огт бодохгүйгээр ажиллаж амьдардаг. Тэр ч битгий хэл, хоол идэхээ мартчихаж ээ гэж хэлэх хүн ч байдаг байна. Тэдний хувьд өлссөн үедээ л хүссэн зүйлээ идчихдэг болохоор, юм идэх гэдэг тийм ч чухал зүйл биш байдаг. Өөрөөр хэлбэл зөвхөн өлссөн үедээ л хоол иддэг гэсэн үг.

  1. Өөрийнхөө идэхийг хүссэн зүйлээ л идэх

Тэд хоол идэхээсээ өмнө, өөрийнхөө биеийг чагнаж юу идэхийг хүсэж байгааг нь сонсож, түүний дараа юу идэхээ шийддэг байна.

  1. Хоолоо аажим аажмаар амталж идэх

Идэж байгаа хоолоо аажмаар амталж, түүнээс олж авч буй эрч хүч, энергийг мэдрэхийг хичээгээрэй. Хэрэв тэгж чадвал, хэдий багахан хэмжээтэй хоол байлаа ч цадах болно. Мөн түүнчлэн, хоолыг сайн зажилж идэх нь ходоодонд учруулах ачааллыг бууруулж, хоол боловсруулалт түргэн явагдахад тус нэмэр болдог гэдгийг санахад илүүдэхгүй. Энгийн юм шиг сонсогдох мөртлөө дадал зуршил болгохын тулд тодорхой хугацаанд хүч чармайлт шаардах болно шүү.

  1. Ходоод цадсан л бол идэхээ болих

Хэрэв таны ходоод цадчихсан л бол илүү зүйл идэх гэж шуналтах хэрэггүй. Ихэнхи хүмүүс хоолоо идэж дуусаад цадчихсан байж нэмж идэх гээд байдаг. Харин жин багатай хүмүүст нийтлэг ажиглагддаг зүйл бол тэд бараг тийм үйлдэл хийдэггүй гэдэг судалгааны үр дүн байдаг. Тэдний бодлоор аль хэдийн цадчихсан болохоор илүү идэх хэрэггүй гэж үздэг.

Ердөө дээрхи 4 зүйлcийг өдөр тутмын амьдралдаа хэрэгжүүлэхэд таны биед өөрчлөлт гарах боломжтой. Зөвхөн өлссөн үедээ, өөрийнхөө хүсч байгаа зүйлээ, аажмаар амталж идээд, цадсан л бол идэхээ зогсооход хангалттай. Үр дүнд нь жингээ тогтмол хэмжээнд барих боломжийг бүрдүүлж өгөх юм.

Ихэнхи хүмүүс жингээ хасахын тулд янз бүрийн хоолны дэглэм барьж, бүр зарим нь идэж буй хоол хүнсэндээ хэт хяналт тавьж, идмээр байгаа ч гэсэн идэж болохгүй хэмээн өөрийгөө хүчлэх тохиолдол байдаг. Тэр ч бүү хэл хоолны дэглэмийг хоол сойхтой андуурах хүмүүс ч цөөнгүй бий. Магадгүй та бидний дунд хоолны дэглэм гэдэг бол турахын тулд л барьдаг зүйл мэтээр төсөөлөгддөг байж ч магадгүй. Гэвч үнэн хэрэгтээ хоолны дэглэм гэдэг бол зөвхөн турахыг хүсэж байгаа хүмүүсийн барьдаг зүйл биш бөгөөд ердөө л биедээ хэрэгтэй зүйлсийг идэхэд анхаарлаа хандуулахыг л хэлдэг байна.

Тийнхүү биедээ хэрэгтэй зүйлсийг идсэнээрээ хүний бие илүүдэл жингээсээ бага багаар салж эхэлдэг байна. Өөрөөр хэлбэл турж байна гэсэн үг. Хамгийн гол нь хоолны дэглэм барьж байгаа үед сэтгэл ханамж үргэлж дээд цэгтээ байх ёстой. Та идэж байгаа хоол хүнснээсээ өндөр сэтгэл ханамжийг олж авч, түүнээс гарах үр дүнд бие тань эрүүлжиж байгааг мэдрэхэд л болно. Ингээд бодоод үзэхээр хоолны дэглэмийг зөвхөн илүүдэл жинтэй хүмүүс барьдаггүй бөгөөд биеэ эрүүлжүүлэхийг хүсдэг хэн бүхний дадал зуршил хэмээн хэлбэл зохилтой. Тэр ч утгаараа хоолны дэглэм гэдэг зөвхөн эмэгтэй хүмүүстэй холбоотой зүйл биш болно. Нас, хүйс зэрэг нь хамааралгүй зүйл юм. Та өөрийн биеэ эрүүлжүүлэхийг хүсэж байгаа бол яг  одооноос идэж буй хоол хүнсээ зөв зохицуулж идэхийг зөвлөж байна.

Та хоолны дэглэм барьж байна гээд идэхийг хүссэн зүйлээсээ татгалзах шаардлага байхгүй. Харин хэмжээг нь багасгах хэрэгтэй. Ямар ч эрүүл гэгддэг хоол хүнсний бүтээгдэхүүнийг хэтрүүлэн хэрэглэвэл биед өөх болон хуримтлагдана.

Үүнээс ямар дүгнэлтэнд хүрч болох вэ гэвэл хэтрүүлж идэх гэдэг бол ердөө л бид бүгдийн сонголттой холбоотой асуудал юм. Тийм болохоор хэтрүүлж идэх асуудалтай тулгардаг бол даваад гарахад тийм ч хэцүү биш гэдгийг энэхүү нийтлэлээ дамжуулж хүргэхийг хичээлээ. Мөн зөв хооллолтын 4 зарчмуудыг заавал бодитоор хэрэгжүүлж үзээрэй.

Танд амжилт хүсье.

Ашигласан материал:

  1. BOB SCHWARTZ, KUMIKO NISHIKAWA “DIETS DON’T WORK”, Хоолны дэглэм үр дүнгүй байх нь Хуудас 96-140
Please follow and like us:

Leave A Reply

Your email address will not be published.