Дайчин-5

“Төгс нэгэн гэж үгүй. Ливэрпүлийн хөгжөөн дэмжигч л биш бол…”

   “Амьддаа бие биенээ хайрла” гэж Монголын гайхалтай нэгэн төр нийгмийн зүтгэлтний алдартай шүлэг байдаг. Үнэхээр л хүн гэдэг бусдын хайр, урмын үггүйгээр амьд явахгүй амьтан. Хэдий таарсан шүүмжлэл бусдыг алдаанаас нь татаж гаргаж, тус нэмрээ өгдөг байж болох ч, уужим сэтгэлийн угаас гарах урмын үг, юу ч тохиолдсон чамтай үргэлж хамт шүү гэдгээ сэтгэл зүрхнээсээ мэдрүүлэх явдал хүн хоорондын харилцааны хамгаас чухал хүчин зүйл гэдэгтэй та санал нийлэхгүй гэж үү? Энэ гайхалтай хүчний ид шидийг уншигч тандаа мэдрүүлэхийг хүсч, ээлжит дайчнаараа дэлхийн хамгийн үнэнч, галзуу “Ливэрпүлийн хөгжөөн дэмжигчид”-ийг онцолъё.

Generated by  IJG JPEG Library
Хөгжөөн дэмжигчид

Английн Премиер Лигийн алдарт Ливэрпүл багийг домогт ахлагч Стивэн Жеррардаар нь, хэдий хуучин ч дэлхий дээрх хамгийн доргио уур амьсгал бүрддэг Энфилд цэнгэлдэх хүрээлэнгээр нь, тэр уур амьсгалыг бүрэлдүүлдэг үнэнч Копуудаар нь дэлхий дахин андахгүй билээ. Хожих хожигдохын алинд ч, багаа цөхрөлтгүй дэмждэг Копуудын өмнө тэдний гэр орон болсон Энфилдэд тоглохоор ирсэн өрсөлдөгч багийн тамирчид цэнгэлдэх байтугай Ливэрпүл хотын онгоцны буудалд газардсанаасаа хойш дарамтыг мэдэрч, зүрх нь үхдэг билээ. Маш олон гайхалтай тамирчид, дасгалжуулагчид Энфилд дэх уур амьсгалыг шагшин магтсан байдаг. Жишээ нь алдарт Манчестер Юнайтэдийн домогт менежер Сер Алекс Фергюсон багийнхаа хамгийн хүнд даалгаврыг “Энфилдэд зочлон тоглох явдал” гэсэн бол, Францын шигшээ багийн довтлогч Арсенал клубын мэргэн бууч Тьерри Анри “Энфилдийн уур амьсгал үнэхээр гайхалтай. Би маш олон цэнгэлдэхэд очиж тоглож үзсэн, гэхдээ аль нь ч Энфилд шиг байж чадахгүй.” гэж хэлсэн байдаг. Энфилд, тэдний Копууд яагаад тийм гайхалтай байдаг юм бэ? Үүний талаар спортын мэдээллийн акулуудын нэг Бличэр Репорт сайтын Хэнри Лофлин 4 жилийн өмнөх нийтлэлдээ дараах шалтгаануудыг нэрлэж байжээ.

  1. Тэд маш бүтээлч

Энфилдэд нүргэлэх Копуудын хоршоо дуунуудад бүдэг бадаг, сул сонсогдох нэг ч үг авиа байхгүй. Тэд тоглогчиддоо зориулан тэдний урам зоригийг хурцлах дуу зохион, нийтээрээ дуулж дэмждэг. Үүнд жишээ болгож, Фернандо Торресын “Liverpool’s Number Nine”, Жон Арне Рийсэгийн “Barnstormer” зэргийг дурдаж болно.

  1. Зочин багийн там

Дээр дурдсан шиг, Энфилдэд зочилно гэдэг зүгээр л там. Английн Премиер Лигээс гадна, Европын томоохон тэмцээнүүдэд ч тивийн хүчирхэг багууд энд ирээд хожигдоод буцдаг. Италийн акул Ювентус, Испанийн галактикос Реал Мадридаас авахуулаад, Челси, Арсенал гээд Энфилдийн хатуу ханыг мөргөөд буцсан багууд олон бий.

  1. Гоолын баяраа тэмдэглэх Копуудын нүргээн

Ливэрпүлийн тоглогч бөмбөг өшиглөөд тэр нь хаалганы торонд хүрэх мөчид Энфилд тэр аяараа нурах шахам их сэтгэл хөөрөлд автаж, чих чинь дүлийрэх шахна. Энэ үед та хэрвээ тэнд байвал, хөгшин Энфилдийн бат бөх байдалд санаа зовинох байх шүү.

  1. “Чи хэзээ ч ганцаараа алхахгүй”

“You will never walk alone”. Энэ бол Копууд, Ливэрпүлчүүдийг нэгтгэдэг тэдний сүлд дуулал. Гэртээ хийх тоглолт болгоныхоо өмнө тэд энэ сүлд дуугаа эгшиглүүлж, багийнхандаа урам зориг хайрлаж, дэлхий дахинд үнэнч хөгжөөн дэмжигчид ямар байдгийг, яаж нэгдэн нийлж бусдад урам хайрладагийг харуулдаг юм. Энэ дууны үг утга, хөгжөөн дэмжигчдийн багаа ялсан ч ялагдсан ч хайрласаар байх агуу хайранд үнэхээр нийцдэг бөгөөд Ливэрпүлийн хөгжөөн дэмжигчдээс улбаалан Шотландын Селтик, Голландын Твенте, Германы Боруссиа Дортмунд, Майнц зэрэг алдартай багуудын дэмжигчид дуулах болсон байдаг.

2924473
Дасгалжуулагч Брэндан Рожэрс

“You will never walk alone” дууны гайхамшигт ид шидийн талаар олон хүн бишрэн ярьсан байдаг. Тэр дундаас Стивэн Жеррард өөрийн намтар номондоо, хөлбөмбөг сонирхогчдын сэтгэл зүрхэнд хоногшин үлдсэн 2005 оны Аваргуудын Лигийн шигшээ тоглолтын талаар дурсаж байхдаа ийн бичжээ.

Liverpool-FC-liverpool-f-c--142832_1600_1200
Стиви Жи

“Истанбулын тэр нэгэн шөнө болсон явдал Ливэрпүлийн гэр бүл, Копуудын хувьд үлгэрийн юм шиг л гайхамшигтай байсан. Улирал эхлэхэд хэн ч сайн явна гэж бодоогүй байсан манай баг, Аваргуудын лигт одтой байж Ювентус, Челси гээд хүчтэй багуудыг ялж финалд гарч ирээд байлаа. Харин нөгөө талаас Кака, Шевченко гээд гялалзаж байсан залуусын Эй Си Милан гарч ирсэн. Истанбулд газардсанаас авахуулаад л хот тэр аяараа улаан өнгөөр хучигдаж, манай хөгжөөн дэмжигчид сурсан зангаараа багаа дэмжихээр олноороо ирсэн байгаа нь мэдэгдэж байлаа. Тоглолт эхлэхийн өмнөх Ататурк цэнгэлдэхийн уур амьсгал ч үнэхээр тасархай байсан. Гэсэн ч бид тоглолтыг үнэхээр сул эхлүүлсэн. Эхний хагаст нүд ирмэхийн завдалгүй Миланы домог Пауло Малдини гоолын салхийг хагалж, үргэлжилээд Аргентины “Валданито” хочит Эрнан Креспо 2 ч гоолыг манай хаалганд хийснээр бид юу юугүй 3-0 гэсэн хар дарсан зүүдэнд яваад орчихсон. Хагас цагийн завсарлагааны үеэрх манай багийн хувцас солих өрөөний уур амьсгал үнэхээр аймшигтай байв. Бүтэн жилийн хөдөлмөрөө Итали багийн уланд гишгүүлчихсэн, бүгд сүр сүлдээ алдан гутарч байлаа. Тэр дундаа хамгийн их сэтгэл өвтгөсөн нь хаа байсан будант Англиас Туркэд багаа дэмжин уухайлахаар ирсэн үнэнч Копуудынхаа итгэлийг хөсөрдүүлсэн явдал байлаа. Аваргуудын Лигийн финалд 3-0 гэсэн дүнгээр бут ниргүүлж байгаад сэхнэ гэдэг бүтэшгүй зүйл, хөгжөөн дэмжигчид маань ч биднийг үзэн ядаж, харааж зүхнэ дээ гэж өөрийн эрхгүй бодож байсан. Гэтэл завсарлагаа арай дуусаагүй байхад Ататуркын хонгилоор танил дууны үгс цуурайтан гутарсан бидний чихэнд хүрэх нь тэр.

Шуурган дундуур алхахдаа

Тэргүүнээ өндөрт өргөж, харанхуйгаас бүү айгаарай

Шуурга дууссаны дараа

Цэлмэг хурмаст тэнгэр, шувуудын уянгалаг жиргээ чамайг хүлээж байна

Салхин дундуур, бороон дундуур алхаад л бай, алхаад л бай

Хүсэл мөрөөдөл чинь хийсэн алга болсон ч

Зүрхэндээ итгэлээ тээгээд алхаад л бай, алхаад л бай

Учир нь чи хэзээ ч ганцаараа алхахгүй

ЧИ ХЭЗЭЭ Ч ГАНЦААРАА АЛХАХГҮЙ ЭЭ

Баг нь хэдий гутамшигтайгаар хожигдож байгаа ч, дууныхаа үг шигээ хэзээ ч итгэлээ алдахгүй хөгжөөн дэмжигчдийнхээ бидэнд урам хайрлан дуулахыг сонсоод нурууны үс маань босч, сэтгэл огшин маш их эрч хүчийг мэдэрч, энэ гайхалтай фэнүүдийнхээ ачийг хариулахын тулд, тэдний төлөө эцсээ хүртэл тэмцэхээр зориг шулуудаж билээ. Багийнхан маань ч адилхан зүйлийг мэдэрч байгаа нь мэдрэгдэж байлаа. Тоглолтын 2-р үе эхлэхийн өмнө багийн ахлагчийн хувьд талбайд гарсан хамтрагчидаа дуудан нэгэн тойргийг үүсгэж, тэдэнд ийн хэлж байлаа. “Та нар үүнийг сонс доо. Эргэн тойронд байгаа энэ их энерги. Биднийг үхсэн ч сэхсэн ч хамтдаа шүү гэж байна. Эднийхээ төлөө энэ 45 минутанд хийж чадах бүхнээ зориулцгаая. Бидэнд алдах юм байхгүй. Бид нар хэзээ ч ганцаараа алхахгүй.” Ингэж зориг орсон багийн маань тоглолт 2-р үед эрс сэргэж, Миланыг тал талаас нь цавчих болов. Эхлээд би мөргөж гоолдон тоог 3-1 болгосон. Дараа нь Владимер Смицер 16 шугамны гаднаас цохиж гоолдсон бол төд удалгүй намайг тэд торгуулийн талбайд унагаснаар Хави Алонзо торгуулийн цохилтыг гүйцэтгэж алдсан хэдий ч, хаалгачаас ойж ирсэн бөмбөгийг нэмж гоолдсоноор ердөө 15 минутад бид бүтэшгүй гэж бодож байсан тооны харьцааг 3-3 болгон тэнцүүлж чадав. Ингэж барьж чадсан багийн сэтгэлзүй баригдсан багаас хол илүү байх нь тодорхой. Энэ эрчээрээ бид нэмэлт цагийн дараах шийдвэрлэх торгуулын цохилтоор Миланыг ялж гайхамшигийг бүтээж чадсан юм. Энэ бол бидний биш, яах аргагүй ямар ч үед биднийг хөсөр хаяагүй үнэнч хөгжөөн дэмжигчдийн маань ялалт байлаа. “

Баярт мөч
Баярт мөч

Үнэхээр тэд бол дайчид юм. Жаргал, зовлонгийн алинд ч зангаа хувиргалгүй төрөлх багтаа үнэнч, урам зоригийн эх булаг, агуу дайчид юм.

“Хар дарсан зүүд болсон тэр тоглолтын дараа бид сүнсээ алдсан биес шиг хувцас солих өрөөндөө шалхайн суусан. Бид ярьж ч, хөдөлж ч чадахгүй байлаа. Тэд биднийг сэтгэлзүйгээрээ хэмхчин дарсан.”

Тухайн үед Миланд хүчин зүтгэж байсан Андре Пирло.

Истанбулын гайхамшиг

 

Ашигласан материал:

  1. Бличер Репорт “Ливерпүлийн фэнүүд дэлхийн шилдэг болох шалтгаан” Хэнри Лофлин нийтлэл 2011
  2. Стивен Жеррард “Миний намтар” ном 2006

 

Э.Өнөболд
Тохокү ИС, Инженерийн факультет, Электроник М1
2015.10.1

Хуваалцах

Be the first to comment

Leave a Reply

Your email address will not be published.


*