Тамхи, хөдөлгөөний дутагдал, дутуу нойр, өдөр тутмын амьдрал дахь хорт хавдрын эрсдлүүд.

“Эхний 3 долоо хоног л тэмцчих. Зөв ахуйн дадлыг үргэлжлүүлэхийн тулд зөв систем, ухаалаг аргууд чухал.”

Хорт хавдар, ахуйн өвчнөөс сэргийлэх үр дүнтэй дадалд алдарт “Бресловын 7 дадал”-ыг нэрлэж болно. 1972 онд Америкын Калифорнын их сургуулийн профессор Бреслов орон нутгийн нийт 7000 хүнийг хамруулан, ахуйн дадал болон биеийн эрүүл мэндийн талаар том хэмжээний судалгаа явуулжээ. Ингэхэд уг хоёр хүчин зүйл хоорондоо нягт уялдаа холбоотой болох нь тогтоогдсон байна. Үүнд дараах 7 төрлийн дадлын дотроос амьдрал ахуйдаа аль болох олныг хэрэгжүүлж байх тусмаа өвчин тусахгүй, урт наслах хандлагатай байсан бол, эсрэгээрээ цөөн тооны дадлыг хэрэгжүүлэх тусам залуугаасаа эрүүл мэндийн хувьд асуудалтай болсон байжээ. Уг 7 дадал нь:

  1. Тохирсон унтлагын цагтай байх. (6-8 цаг)
  2. Тамхи татахгүй байх.
  3. Биеийн хэвийн жинг хадгалах.
  4. Архи хэтрүүлэн хэрэглэхгүй байх.
  5. Тогтмол хөдөлгөөн хийх.
  6. Өглөөний цайг өдөр бүр ууж байх.
  7. Өглөө, өдөр, оройн үндсэн хоолнуудын завсраар хивэхгүй байх.

Энэ 7 дадал анх нийтэд зарлагдсан нь даруй 40 гаран жилийн өмнө боловч, орчин үед олон улсад зөвлөгдөж буй “хорт хавдраас сэргийлэх ахуйн дадлууд”-тай нийтлэг шинжийг агуулж байгаа юм. Энэ 7 дадлыг сонсоход туйлын ойлгомжтой бөгөөд огтхон ч шинэ содон юмгүй мэт боловч, бодитоор бүгдийг нь хэрэгжүүлж чадаж байгаа хүн цөөн болов уу. “Мэдэж байгаа хэдий ч, яг хэрэгжүүлэх гэхээр хэцүү юм” гэж хэлэх хүн олон биз ээ.

Жишээлбэл биеийн жингээ хянах болон тогтмол хөдөлгөөний дадлын тухайд “Зориг шулуудан хөдөлгөөн, хоолны дэглэмийг эхлүүлсэн боловч, удаан үргэлжлээгүй” гэх туршлагатай хүн уншигч та бүхний дунд байгаа л байх. Мэдээж хэрэг сурсан юмыг сураар боож болдоггүйн адилаар өдий болтол дадчихсан зуршлыг өөрчлөхөд нилээдгүй энерги, хүч хэрэгтэй хэдий ч, юу юуны түрүүнд бодож буй өнцгөө болон үйлдлээ өөрчлөхөөс эхэлсэн нь үр ашигтай болов уу. Үйлдлээ өөрчлөхөд, дадлууд өөрчлөгдөж, дадлууд өөрчлөгдөхөд ирээдүйн амьдрал чинь зөв чиг рүүгээ том алхам хийх боломж өндөр болж ирнэ шүү дээ.

Мөн аливаа нэг үйлдэл шинэ дадал болон зурштал хамгийн багадаа 3 долоо хоног хэрэгтэй гэсэн ерөнхий ойлголт байдаг. Их олон тохиолдолд 3 долоо хоног үргэлжлүүлэхээсээ өмнө шантарч болих, аль эсвэл өөр арга руу урваж сарнидаг байна. Хоолны дэглэмээс авахуулаад ер нь ямарваа нэг дадал зуршлын үр дүн тийм ч хурдан гарч ирэхгүй нь мэдээж. Гэвч юун түрүүнд ямар ч байсан 3 долоо хоног үргэлжлүүлээд үзье гэсэн сэтгэлзүйн бэлтгэлтэйгээр хичээгээд үзээрэй.

Түүнчлэн шинэ дадлыг биедээ шингээхийн тулд “үргэлжлүүлэх стратеги” их чухал. Саяхан л гэхэд идсэн зүйлсээ тэмдэглээд явдаг “тэмдэглэх дэглэм” их моданд орсон. Зөв дадлыг зүгшрүүлэхийн тулд ингэж бичиж тэмдэглэх гэдэг их зүгээр арга юм. Календар, тэмдэглэлийн дэвтэр дээрээ хөдөлгөөн хийсэн өдрөө цохлох, гүйсэн зайгаа бичиж үлдээх гэх мэтээр. Энэ “нүдэнд харагдах үр дүн” нь “маргааш ч гэсэн үргэлжлүүлье”, “энэ хүртэл үргэлжлүүлсэн болохоор одоо болих нь хайран” гэх мэтээр нэмэлт урам зориг, мотивац болж өгөх ба нэг төрлийн үргэлжлүүлэх стратеги юм. Сүүлийн үед хөдөлгөөн, биеийн жин гэх мэт өөрийн эрүүл мэндийн үзүүлэлтүүдийг тэмдэглэж хөтлөн, ажиглах боломжтой ухаалаг гар утасны аппликэшнүүд олноор гарч ирснийг энд дурдаж бас болох юм.

Эцэст нь хэлэхэд, ахуйн зөв дадлыг бий болгоход тэвчээр ч гэдэг юмуу, “ингэхгүй л бол болохгүй” гэсэн өөрийгөө албадсан, дотогшоогоо ухамсартай бол бас удаан үргэлжлэхгүй байх тал бий. Тиймээс гэр бүл, найз нөхөддөө хэлж, зорилгоо гадагш ил тавин, болих боломжгүй нөхцөл байдлыг өөртөө үүсгэх, мөн найз нартайгаа хамт эхлүүлэх зэргээр туршиж үзвэл хөгжилтэй байж болох юм. Эрүүл чийрэг, сайхан болчихсон байгаагаар өөрийгөө төсөөлөх, өмсмөөр байгаа хувцсаа сэтгүүл дээрээс хайх гэх мэт өөрийн гэсэн зорилго, хүлээлтийг бий болгох нь ч удаан үргэлжлүүлэхийн төлөөх чухал урам зориг болж өгнө.

Энэ мэтчилэн ахуйн дадлуудын талаарх бүх талын дэлгэрэнгүй мэдээллийг “Хорт хавдраас урьдчилан сэргийлэх 50 дадал” цуврал нийтлэлийн маань дараа дараагийн дугааруудаас уншиж судлан, зөв зүйтэй дадал зуршлуудыг өөртөө дадуулаарай.

Хирашима Тэцүро “Хорт хавдраас урьдчилан сэргийлэх 50 дадал” номоос.

 

Э.Өнөболд
Тохокү ИС, Инженерийн факультет, Электроник М2
2016.5.20

Хуваалцах

Be the first to comment

Leave a Reply

Your email address will not be published.


*