Номын амт: Дэлхийн багана

Уншигчдынхаа номын их ертөнцөөр хамтдаа аялахын тулд бид бүхэн шинээр “Номын амт” буланг сайтдаа бий болгож буй билээ. Энэхүү шинэхэн булан маань, уншиж барагдашгүй номын их далайгаас өөрийн үнэт сувдыг шүүрэхэд тань өчүүхэн ч болов тус болох аваас бидний зорьсон хэрэг биелэх билээ. Ингээд эхний дугаараа та бүхэндээ хүргэж байна, таалан соёрхоно уу. 

5043Нэр: The Pillars of the Earth

Зохиолч: Ken Follett

Төрөл: Түүхэн, фикшён

Хэвлэгдсэн он: 1989

Хуудас: 973

Амжилт: Нью-Йорк Таймс Бэст селлэр листэд 18 долоо хоног, Итали, Британи, Канадын Бэст селлэр листийн тэргүүн байранд бичигдсэн, Германы листээс 6 жил гараагүй, BBC топ 200 зохиолын 33-т, Опрагийн номын клубт 2007 онд сонгогдсон.

 Триллер зохиол уншдаг хүмүүс Кен Фоллеттыг андахгүй мэднээ. Түүний зохиолууд 20-р зууны дэлхийн түүх, түүн доторх томоохон үйл явдлуудыг үнэн бодитойгоор багтаахын зэрэгцээ, тэдгээрийг тодотгож өгөх фикшёнал дүрүүдийнхээ хүн талыг ч маш уран мэдрэмжтэй бөгөөд шударгаар дүрслэн гаргадаг онцлогтой. Сүүлд 2010 оноос эхлэн гарсан “Зууны гурамсан зохиол” нь үнэхээр гайхалтай болсон байсан. Гэхдээ энэ удаадаа түр өнжье. Бичсэн зохиол бүр нь олон орны Бэст селлэр листэд төвөггүй гарч ирдэг энэ хүний нэгэн өвөрмөц зохиолыг энэ удаа онцоллоо. Дэлхийн 1, 2-р дайн, Германы нууц ажилтан, Оросын тагнуул гээд триллер зохиолуудаараа алдаршаад байсан түүний хувьд 12-р зууны өмнөд Англи дахь Катедрал сүмийн бүтээн байгуулалтын талаар роман бичихэд эхэндээ их хүнд байсан гэдэг. Шашны өвөрмөц хүрээлэлд төрж өссөн түүний хувьд, хувийн сүсэг бишрэл маруухан хэрнээ, бага залуугаасаа харж биширч ирсэн Европын сүмийн уран барилга, архитектурын шийдлийн талаар зохиол бичих санаа олон жил цээжинд нь байж. Гэвч зориод бичиж эхлүүлээд байтал, уншигчдын өсөн нэмэгдэх триллер зохиолын хүлээлтээс үүдэн уг бичилтээ зогсоож, олон жилийн дараа ахин бичиж эхэлсэн гэх зэргээр энэхүү бүтээлийн бүтсэн түүх ч ярвигтай. Ойр тойрныхон нь, бизнес хамтрагчид нь түүний энэ сүмийн талаар бичих санааны талаар, “буруу хүн буруу зүйлээ бичиж их эрсдэл үүрэх хэрэг ер нь байна уу даа, триллерээ л бичээд байвал нэр хүнд чинь өсөөд л байна биш үү” гэж хүртэл болгоомжлуулж байсан аж. Гэхдээ тэр энэ ажлын ард гарч чадсан юм. Өмнөх зохиолууд шигээ зүгээр л нэг “бэст селлэр” байгаасай гэж тэр хүссэнгүй. Гайхамшигтай бүтээл болгох юмсан гэж итгэж найдан ханцуй шамлан ажилдаа оржээ. Энгийн үед ажлын 5 өдөр зохиолоо бичиж, хагассайн өдөр захианууддаа хариу бичих зэргээр харилцаа холбооны ажлаа амжуулдаг байсан бол, “Дэлхийн багана”-г бичих явцад оргил үедээ 7 хоногийн 7 өдөр зохиолоо бичиж байсан гэж дурсамждаа бичсэн байдаг. Арга ч үгүй дээ, олон арван жилийн үйл явдлыг агуулсан том роман хойно. Эцэстээ уг зохиол 1989 онд хэвлэгдэв. Эхэн үедээ фидбак тийм ч сайнгүй, шагнал урамшилд ч нэр дэвшихгүй явсан байна. К. Фоллетт ч өөрөө “за даа байдаг л нэг зохиол болж дээ” гэж бодож эхлээд байтал уншигчдын хандлага аажмаар хувирч, гайхамшигтай зохиол болж чадсан нь батлагдаж эхэлж. Олон орны Бэст селлэрийн листэд тэргүүлж, хэдэн зуун мянган хувь борлогдсон юм. Ялангуяа Германы листэд бүтэн 6 жилийн турш нэр нь хадаастай байсан гэж байгаа. Нөгөө триллер зохиолч маань энд тэндхийн номын яармаг дээр очиход голцуу “Дэлхийн багана”-н талаар асуулт ирэх бөгөөд, ихэнх уншигчид нь амьдралдаа уншсан хамгийн гайхалтай ном гэж сайшаан магтаж байжээ. Энэ бүхний эцэст К.Фоллетт ч өөрөө “миний бичсэн хамгийн сайн ном бол “Дэлхийн багана”, гэхдээ энэ бүтээлийг гайхамшигтай амжилтад хүргэсэн нь уншигчид та нар минь юм шүү” гэж хэлсэн байдаг.  Энэ зохиолоос сэдэвлэн 2010 онд “Дэлхийн багана” олон ангит кино бүтээгдсэн ба, гол дүрд нь алдарт Эдди Рэдмэйн тогложээ.

Номын агуулгын хувьд, дээр дурьдсанчлан 12-р зууны өмнөд Английн амьдрал өрнөнө. Эзэн Чингис хааны яг төрж мандаж байх үеийн европ ямар хэв маягтай байсныг олж харж болно. Бас их сонин шүү. Үйл явдлын талаар нэг их нарийн бичиж нуршмааргүй байна. Та өөрөө уншиж, сэтгэлийн таашаал аваарай. Бусад номнуудынхаа адилаар К. Фоллетт уг номд ч, улс төр, шашны түүхэн бодит үйл явдлыг зохиолынхоо багана болгожээ. Түүхэн танин мэдэхүйн их том ач холбогдолтой гэж хэлж болно. Аварга том Катедрал сүмийг барьж байгуулахад шаардагдах олон арван жилийн үйл явдал хэдий ч, тэр бүртээ сонирхолтой нугалаа, драмаар баяжигджээ. Ер нь К. Фоллеттын бичилтийг би байгалиасаа урссан шинжтэй гэж тодорхойлдог. Заримдаа нэг фикшён ч юмуу бариад сууж байхад, уншигчыг уйдаахгүйн тулд гэв гэнэт огцом үйл явдал өрнөх ч юмуу, бодит биш итгэмээргүй зүйлс гарч ирдэг. Харин К. Фоллеттын зохиолд огтхон ч тийм биш, үйл явдлууд нь зоргоороо урсах хирнээ, хэзээ ч уйдаахгүй. Түүхэн романы онцлог ч байж болох юм. Мөн нэг сонирхолтой зүйл ажиглагддаг нь дүрүүдийн бодол маш өвөрмөцөөр дүрслэгдсэн байдаг. Нэг ёсны уншаад, амьдрал дээрх харилцааны стратегийн хичээл авч байгаа юм шиг. Энд ингэж хэлвэл, би ийм юм эндээс олж авна, харин тэрийг алдана ч гэдэг юмуу. Д. Маам гуайн “Газар шороо” романд дүрүүдийн бодол, үнэн мөн нь дотроо хэрнээ, хэлж гаргахтайгаа яаж зөрдөгийг уран яруу дүрсэлдэгтэй их төстэй. Ер нь зохиолд гардаг хүний амьдарлын сайн зам, муу замын ялгаа, үйлийн үрийн илрэл нь “Газар шороо” дээр гардагтай тун адилхан. Тэгэхээр К.Фоллетт бол Английн Маам гуай юм байна аа гээд хэлчихэж бас болохоор.

За тэгээд уншигчиддаа зөвлөхөд, заавал олж уншаарай. Даа ялангуяа зориуд цаг гаргаж уншаарай. Би хувьдаа номыг өдөр бүр тогтмол, тодорхой хэмжээгээр уншаад ажил, сургуульдаа саад хийхээргүйгээр тайван, хэд хэдээр нь ар араас нь гаргаад явах стилийг эрхэмлэдэг. Гэхдээ энэ номын хувьд бол өөр. Бүр нэг зорьж амралтаараа тааруулж ч юмуу, бямба ням гаригийнхаа хуваарийг хоосолж байгаад, өрөөндөө бүгж байгаад уншихыг зөвлөнө. Учир нь энэ ном өөрөө тэгэхийг шаардана. 1000 орчим хуудас хэрнээ, та нэг эхэлвэл хэзээ ч буцааж тавихыг хүсэхгүй.

Хуваалцах

1 Trackback / Pingback

  1. Номын амт: Зүүний сүв – ИХ НҮДЭН

Leave a Reply

Your email address will not be published.


*